କୋକସରା/କ୍ରାନ୍ତିକ୍ଷେତ୍ର ନ୍ୟୁଜ୍ : ଦିର୍ଘ ବର୍ଷରୁ କୋକସରା ବ୍ଲକ କାଉଡୋଲା ମା’ ଠାକୁରାଣୀ ମନ୍ଦିର ଦେଇ ଯାଇଥିବା ଗ୍ରାମ୍ୟ ରାସ୍ତାର ଶେଷ ମୁଣ୍ଡର କିଛି ଜାଗାକୁ ଗ୍ରାମର ଜଣେ ବ୍ୟକ୍ତି କବ୍ଜା କରି ରହିଥିଲେ। ଏନେଇ ଅଭିଯୋଗ ପରେ ବୁଧବାର କୋକସରା ତହସିଲଦାରଙ୍କ ଉପସ୍ଥିତିରେ ଜାଗା ଉଚ୍ଛେଦ କରାଯାଇଛି। ସୂଚନା ଅନୁସାରେ, ଗ୍ରାମର ଜୈନିକ ବ୍ୟକ୍ତି ଉକ୍ତ ରାସ୍ତାର ଶେଷ ମୁଣ୍ଡ କିଛି ଜାଗାକୁ ବର୍ଷ ବର୍ଷ ଧରି ନିଜ ଅକ୍ତିଆରେ ରଖି ଜାଲି (ନେଟ୍) ବାନ୍ଧି ଅବରୋଧ କରିଥିଲେ। ଫଳରେ ଉକ୍ତ ବସ୍ତିର ଲୋକେ ଯାତାୟାତରେ ଅନେକ ଅସୁବିଧାର ସମ୍ମୁଖୀନ ହେବାକୁ ପଡୁଥିଲା। ଏନେଇ ସାହି ବାସୀନ୍ଦାଙ୍କ ସ୍ୱାର୍ଥକୁ ଦୃଷ୍ଟିରେ ରଖି ସାମାଜିକ କର୍ମୀ ତଥା ବରିଷ୍ଠ ସାମ୍ବାଦିକ ଚକ୍ରଧର ବେଶ୍ରା ଦିର୍ଘ ଦିନ ହେଲା କଳାହାଣ୍ଡି ଜିଲ୍ଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରି ଆସୁଥିଲେ। ଏନେଇ ଆଜି କୋକସରା ତହସିଲଦାର କ୍ଷୀରୋଦ ବିହାରୀ ଭାରତ ନାଗଙ୍କ ଉପସ୍ଥିତିରେ ଆମପାଣି ଥାନା ଅଧିକାରୀ ଜେ.ପି ହୋତା, ରାଜସ୍ୱ ନିରୀକ୍ଷକ କୃଷ୍ଣଚନ୍ଦ୍ର ଭୋଇ ପହଞ୍ଚି ପୁଣି ଥରେ ରାସ୍ତାକୁ ସମସ୍ତଙ୍କ ଉପସ୍ଥିତିରେ ମାପାଇ ଜାଗା ଚିହ୍ନଟ କରାଇଥିଲେ। ଏହାପରେ ରାସ୍ତାରେ ଟାଙ୍ଗିଥିବା ନେଟକୁ ହଟାଇ ଦିଆଯାଇଛି। ଏବଂ ସମ୍ପୃକ୍ତ ରାସ୍ତା କବ୍ଜା କାରୀ ବ୍ୟକ୍ତିଙ୍କୁ ଆଗାମୀ ଦିନରେ ରାସ୍ତା ଅବରୋଧ କିମ୍ବା ରାସ୍ତାରେ ଚାଲିବା ପାଇଁ କାହାକୁ ମନା ନ କରିବା ପାଇଁ ଚେତାବନୀ ଦିଆଯାଇଛି। ବର୍ତ୍ତମାନ ଉକ୍ତ ସ୍ଥାନରେ ଜଗା ଜବରଦଖଲ ଉଚ୍ଛେଦ ହୋଇଛି। ଅନ୍ୟପଟେ କୋକସରା ତହସିଲଦାରଙ୍କ ଏହି ପ୍ରୟାସକୁ ବସ୍ତିବାସିନ୍ଦା ବେଶ୍ ପ୍ରଶଂସା କରଛନ୍ତି।
