ଗୋଲାମୁଣ୍ଡା/କ୍ରାନ୍ତିକ୍ଷେତ୍ର ନିଉଜ୍ : କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକ ମହାଲିଙ୍ଗଠାରୁ ଦାବଜୋର ମୁଖ୍ୟମନ୍ତ୍ରୀ ସଡକ ରାସ୍ତା କାର୍ଯ୍ୟ ସରିବାର ବର୍ଷେ ହେଉଣୁ ଭାଙ୍ଗି ପଡିଥିବା ବେଳେ ଏଥିିପାଇଁ ଉକ୍ତ ରାସ୍ତା ଦେଇ ଯାଉଥିବା ଅନେକ ବାଇକ ଆରୋହି ଦୁର୍ଘଟଣାର ସମ୍ମୁଖୀନ ହେଉଥିବା ଅଭିଯୋଗ ହେଉଛି। ମହାଲିଙ୍ଗଠାରୁ ଦାବଜୋର ରାସ୍ତା ଗତ ୨୦୨୩ ଡିସେମ୍ବର ମାସ ୧୩ ତାରିଖ ଦିନ ଧର୍ମଗଡ ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ନିର୍ମାଣ କାର୍ଯ୍ୟ ଆରମ୍ଭ ହୋଇଥିବା ବେଳେ ଗତବର୍ଷ ଜୁନ ମାସ ତାରୀଖରେ କାର୍ଯ୍ୟ ସରିଥିବା ସୂଚନାଫଳକରୁ ଜଣାପଡୁଛି । ଏହି ରାସ୍ତା କାର୍ଯ୍ୟ ନୂଆପଡା ଜିଲ୍ଲାର ଏ ଶ୍ରେଣୀ ଠିକାଦାର ରୂପେଶ ଅଗ୍ରୱାଲ କରିଥିବା ଜଣାଯାଏ। ସୂଚନାଫଳକ ଅନୁସାରେ ୨୩ ଲକ୍ଷ ୧୭ ହଜାର ୩୭୩ ଟଙ୍କା ଅଟକଳ ମୂଲ୍ୟ ଦର୍ଶା ଯାଇଥିବା ବେଳେ ଏହାର ଅଟକଳ ପରିମାଣକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି । କାରଣ ଏତେ କମ ପରିମାଣର ଅଟକଳ ମୂଲ୍ୟରେ ମୁଖ୍ୟମନ୍ତ୍ରୀ ସଡକ ରାସ୍ତା ହେବା ସଂମ୍ଭବପର ନୁହେଁ। ଏହି ରାସ୍ତା କାର୍ଯ୍ୟ କଳାହାଣ୍ଡି ଜିଲ୍ଲା ମହାଲିଙ୍ଗଠାରୁ ବଲାଙ୍ଗିର ଜିଲ୍ଲା ଦାବଜୋର ପର୍ଯ୍ୟନ୍ତ ୬ କିମି ରାସ୍ତା ହୋଇଛି। କାର୍ଯ୍ୟ ଚାଲୁଥିବା ସମୟରେ ଏହି ରାସ୍ତାରେ ନିମ୍ନା ମାନର କାର୍ଯ୍ୟ ହେଉଥିବା ନେଇ ଅନେକ ଅଭିଯୋଗ ହୋଇଥିବା ବେଳେ ଅନେକ ଖବରକାଗଜରେ ନିମ୍ନା ମାନର କାମ ହେଉଥିବା ନେଇ ଖବର ପ୍ରସାରଣ ହୋଇଥିଲା। କିନ୍ତୁ ଏହି ଖବରକୁ ବେଖାତିର କରିଥିଲା ସଂପୃକ୍ତ ଠିକା ସଂସ୍ଥା ଓ ଗ୍ରାମ୍ୟ ଉନ୍ନୟନ ବିଭାଗ । ଯାହାରି ଫଳରେ ରାସ୍ତାର ଅନେକ ଯାଗାରେ ରାସ୍ତା ଭାଙ୍ଗି ପଡିଥିବା ବେଳେ ଅନେକ ସ୍ଥାନରେ ରସ୍ତା ଦବି ଯାଇଛି । ଅନେକ ସ୍ଥାନରେ ପିଚୁ ଉଠି ପଡିଥିବା ବେଳେ ଅଣ୍ଡୁଏ ଆଣ୍ଡୁଏ ଖାଲ ହୋଇଯାଇଥିବାରୁ ବର୍ଷା ପାଣି ଭତ୍ତି ହୋଇ ଦିନକୁ ଦିନ ରାସ୍ତା ସୋଚନିୟ ହୋଇପଡିଲାଣି । ଏହି ରାସ୍ତା ଦେଇ ଅଞ୍ଚଳର ଲୋକେ ପଡୋଶି ନୁଆପଡା ଜିଲ୍ଲା ତଥା ଛତିଶଗଡକୁ ଯିବା ଆସିବା କରୁଥିବା ବେଳେ ରାସ୍ତାର ବଡ ବଡ ଖାଲରେ ପଡି ଅନେକ ବାଇକ ଆରୋହି ଦୁର୍ଘଟଣା ଶିକାର ହୋଇଥିବା ଅଭିଯୋଗ ହେଉଛି । ଏହି ରାସ୍ତା ନିର୍ମାଣ କାର୍ଯ୍ୟ ଏକ ବର୍ଷ ହୋଇ ଥିବା ବେଳେ ଏହାର ରକ୍ଷଣା ବେକ୍ଷଣ ୨୦୨୯ ମସିହା ଜୁନା ମାସ ୧୨ ତାରିଖ ପର୍ଯ୍ୟନ୍ତ ଅଛି । ସଂପୃକ୍ତ ରାସ୍ତା ବିଷୟରେ ମତାମତ ନେବାକୁ ବିଭାଗୀୟ କନିଷ୍ଠ ଯନ୍ତ୍ରୀଙ୍କୁ ଫୋନ ମାଧ୍ୟମରେ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ନଉଠାଇବାରୁ ତାଙ୍କର ମତାମତ ମିଳି ପାରିନାହିଁ । ଏହି ରାସ୍ତା ଧିରେ ଧିରେ ଖରାପ ହେବାକୁ ବସୁଥିବା ବେଳେଏହି ରାସ୍ତାକୁ ତୁରନ୍ତ ମରାମତି କରିବା ସହିତ ଭିଜିଲଲାନ୍ସ ତଦନ୍ତ କରିବାକୁ ସ୍ଥାନୀୟ ଲୋକେ ଦାବୀ କରୁଛନ୍ତି ।
