ଜୁନାଗଡ଼/କ୍ରାନ୍ତିକ୍ଷେତ୍ର ନ୍ୟୁଜ : ୭୯ତମ ସ୍ୱାଧୀନତା ଦିବସ ଅବସରରେ ଜୁନାଗଡ଼ ହାଇସ୍କୁଲ ଖେଳ ପଡିଆ ଖେଳର ଉତ୍ସାହରେ ମଣ୍ଡିତ ହେଲା। ଜୁନାଗଡ଼ ଲଙ୍କେଶ୍ଵରୀ କ୍ଲବ ପକ୍ଷରୁ ଆୟୋଜିତ ବନ୍ଧୁତ୍ୱପୂର୍ଣ୍ଣ ଫୁଟବଲ ମ୍ୟାଚରେ ଜୁନାଗଡ଼ ଫୁଟବଲ କ୍ଲବ ଓ ଆଇ.ଆର୍.ବି. ଦଳ ମୁହାଁମୁହିଁ ହୋଇ ୧–୧ ଗୋଳରେ ଖେଳକୁ ସମାପ୍ତ କରିଲେ। ମ୍ୟାଚ ଭରି ପ୍ରତିଦ୍ଵନ୍ଦ୍ୱିତା,ଗତି ଓ ଦର୍ଶକଙ୍କ ଉତ୍ସାହ ଦେଖାଗଲା। ମ୍ୟାଚର ପରିଚାଳନା ରାଜେନ୍ଦ୍ର ଲହଜଲ,ସୁବାସ ତାନଡି ଓ ରିଙ୍କୁ ପ୍ରଧାନି କରିଥିଲେ । ଖେଳର ପ୍ରଥମାର୍ଧରୁ ଦୁଇ ଦଳ ଆକ୍ରମଣାତ୍ମକ ଭାବେ ଖେଳି ଗୋଳ ସୁଯୋଗ ସୃଷ୍ଟି କରିଥିଲେ। ଦ୍ୱିତୀୟାର୍ଧରେ ଦୁହେଁ ପକ୍ଷର ଗୋଲକିପରଙ୍କ ସୁଦୃଢ଼ ପ୍ରଦର୍ଶନ ଦର୍ଶକଙ୍କ ହସ୍ତତାଳି କୁ ସ୍ୱଭାବିକ କରିଥିଲା। ଶେଷ ପର୍ଯ୍ୟନ୍ତ ବିଜୟ ନିଶ୍ଚିତ ହୋଇନଥିବାରୁ ମ୍ୟାଚ ୧–୧ ରେ ବରାବରୀ ଘୋଷିତ ହେଲା। ଅନୁଷ୍ଠାନରେ ମୁଖ୍ୟ ଅତିଥି ଭାବେ ଜୁନାଗଡ଼ ସହରର ସମାଜସେବୀ,ଶିଳ୍ପପତି ଏବଂ ବରିଷ୍ଠ ଆଇନଜୀବି ଦୁର୍ଗା ପ୍ରସାଦ ନାଏକ ଯୋଗଦେଇ ଖେଳାଳିଙ୍କୁ ଉତ୍ସାହିତ କଲେ। ସମ୍ମାନିତ ଅତିଥି ଭାବେ ଜୁନାଗଡ଼ ବିଜ୍ଞାପିତ ଅଞ୍ଚଳ ପରିଷଦର ପୂର୍ବତନ କାର୍ଯ୍ୟନିର୍ବାହୀ ଅଧିକାରୀ ଇଶ୍ଵର ଚନ୍ଦ୍ର ପୁଝାରୀ ଉପସ୍ଥିତ ଥିଲେ ଏବଂ ଦୁଇ ଦଳର ମନୋବଳ ବଢ଼ାଇଲେ। ଏହି ଅବସରରେ ଅବସରପ୍ରାପ୍ତ ଇଣ୍ଡିଆନ୍ ଆର୍ମି ସଦସ୍ୟ ଦିଲୀପ ଧଙ୍ଗଡାମାଝି,ଶିକ୍ଷାବିଦ୍ ଯୀଶୁ ଗୋପାଳ ଏବଂ ଲଙ୍କେଶ୍ଵରୀ କ୍ଲବର ସମସ୍ତ ସଦସ୍ୟ ଓ କାର୍ଯ୍ୟକର୍ତ୍ତା ଉପସ୍ଥିତ ରହି ମ୍ୟାଚକୁ ସଫଳ କରିଥିଲେ। କ୍ଲବ ପକ୍ଷରୁ ଅତିଥିମାନଙ୍କୁ ସମ୍ମାନ ଜଣାଇବା ସହ ଦୁଇ ଦଳର ଖେଳାଳିଙ୍କୁ ସ୍ମାରକ ଦିଆଗଲା। ଲଙ୍କେଶ୍ଵରୀ କ୍ଲବ ଅଧିକାରୀମାନେ କହିଛନ୍ତି,ସ୍ୱାଧୀନତା ଦିବସ ଭଳି ଜାତୀୟ ଅବସରରେ ଏମିତି ବନ୍ଧୁତ୍ୱପୂର୍ଣ୍ଣ ଖେଳ ଆୟୋଜନ ଯୁବପିଢିକୁ ଖେଳକୁ ଆକୃଷ୍ଟ କରେ ଏବଂ ସମାଜରେ ସଦଭାବ ବଢ଼ାଏ। ଆଗାମୀ ଦିନରେ ଏହି ପ୍ରୟାସକୁ ଆହୁରି ବ୍ୟାପକ କରିବା ପାଇଁ ସମ୍ପ୍ରଦାୟ ଓ ଖେଳପ୍ରେମୀମାନଙ୍କ ସହଯୋଗ ଆହ୍ୱାନ କରାଯାଇଛି।
