ଥୁଆମୂଳ ରାମପୁର/କ୍ରାନ୍ତିକ୍ଷେତ୍ର ନ୍ୟୁଜ୍: କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ଥୁଆମୂଳ ରାମପୁର ସଦର ମହକୁମାର କାଳି ମନ୍ଦିର ପଡାର ପଦୁକିଶୋର ପୁଝାରୀଙ୍କ ଘର ଉପରେ ଏକ ଆମ୍ବ ଗଛର ବିରାଟକାୟ ଶୁଖିଲା ଶାଖା ଭାଙ୍ଗି ପଡିଥିବା ଦେଖିବାକୁ ମିଳିଛି। ମଙ୍ଗଳବାର ରାତି ୮ ଘଣ୍ଟା ସମୟରେ ନିଜ ପରିବାର ସହିତ ଭୋଜନ କରିବାକୁ ବସିଥିଲେ। ଏତିକିବେଳେ ଘର ପାଖରେ ଥିବା ଆମ୍ବ ଗଛର ଏକ ବିରାଟକାୟ ଶୁଖିଲା ଶାଖା ଘର ଉପରେ ପଡିଥିଲା। ଫଳରେ ଘରର ଆଜବେଷ୍ଟ ଗୁଡିକ ଭାଙ୍ଗିବା ସହିତ ଘରଭିତର ଜିନିଷପତ୍ରର ବ୍ୟାପକ କ୍ଷତି ହୋଇଥିବା ବେଳେ ପଦୁକିଶୋରଙ୍କ ସହ ସ୍ତ୍ରୀ ରଞ୍ଜିତା ଓ ଝିଅ ସୃଷ୍ଟି ଆହତ ହୋଇଛନ୍ତି। ପଦୁକିଶୋର ଏବଂ ଝିଅ ସୃଷ୍ଟିର ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ସ୍ତ୍ରୀ ରଞ୍ଜିତା ମଧ୍ୟ ଆହତ ହୋଇଛନ୍ତି। ତାଙ୍କୁ ତୁରନ୍ତ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ଚିକିତ୍ସା ପରେ ଆଜି ସକାଳେ ଡାକ୍ତରଖାନାରୁ ନିଜ ଘରକୁ ଫେରିଛନ୍ତି।ଘରର କ୍ଷୟକ୍ଷତି ଅନୁସାରେ ପ୍ରଶାସନ ସହାୟତା କରିବା ସହିତ ତାଙ୍କୁ ପଲିଥିନ ଯୋଗାଇବା ପାଇଁ ସାଧାରଣରେ ଦାବି ହେଉଛି। ଏପଟେ ଖବର ପାଇ ସ୍ଥାନୀୟ ରାଜସ୍ବ ନିରୀକ୍ଷକ ତୁଳସୀ ନିଆଲ୍ ଘଟଣା ସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରି ଫେରିଥିବା ବେଳେ କ୍ଷୟକ୍ଷତିର ଆକଳନକୁ ନେଇ ସରକାରୀ ସହାୟତା ଯୋଗାଇଦିଆଯିବ ବୋଲି ଶ୍ରୀ ନିଆଲ୍ ସୂଚନା ଦେଇଛନ୍ତି। ଯେହେତୁ ଲଗାଣ ବର୍ଷା ଜାରି ରହିଥିବା ବେଳେ ପରିବାର ଲୋକେ କାହାଘରେ ମୁଣ୍ଡଗେଞ୍ଜି ରହିବେ ତାହାକୁ ନେଇ ଚିନ୍ତା ପ୍ରକଟ କରିଛନ୍ତି ପଦୁକିଶୋର।
