ଲାଞ୍ଜିଗଡ଼/କ୍ରାନ୍ତିକ୍ଷେତ୍ର (ସୌମ୍ୟ ରଞ୍ଜନ ପାତ୍ର) : ସାମାଜିକ ସୁରକ୍ଷା ଏବଂ ସମ୍ମାନଜନକ ଜୀବନଯାପନର ମୂଳଦୁଆ ଉପରେ ହିଁ ପ୍ରକୃତ ବିକାଶର ସୌଧ ଗଢ଼ିଉଠେ। କେବଳ ଭୌତିକ ପ୍ରଗତି ନୁହେଁ, ବରଂ ପ୍ରତ୍ୟେକ ନାଗରିକଙ୍କୁ ସେମାନଙ୍କର ସାମ୍ବିଧାନିକ ଅଧିକାର ଏବଂ ସ୍ଥାୟୀ ଠିକଣା ପ୍ରଦାନ କରିବା ହେଉଛି ପ୍ରଶାସନର ପ୍ରକୃତ ସଫଳତା। ଏକ ନିର୍ଦ୍ଦିଷ୍ଟ ଠିକଣା କେବଳ ମାଟିର ଖଣ୍ଡିଏ କାଗଜ ନୁହେଁ, ଏହା ବ୍ୟକ୍ତିର ଆତ୍ମବିଶ୍ୱାସର ପ୍ରତୀକ ଏବଂ ତା’ର ଭବିଷ୍ୟତ ଗଢ଼ିବାର ପ୍ରଥମ ପାହାଚ। ପ୍ରଶାସନିକ ବ୍ୟବସ୍ଥା ଯେତେବେଳେ ନିଜର ଚାରିକାନ୍ଥରୁ ବାହାରି ତୃଣମୂଳ ସ୍ତରର ଅଭାବକୁ ସମାଧାନ କରିବାକୁ ଆଗେଇ ଆସେ, ସେତେବେଳେ ଗଣତନ୍ତ୍ର ପ୍ରକୃତ ଅର୍ଥରେ ଲୋକଙ୍କ ପାଖରେ ପହଞ୍ଚିଥାଏ। ଏହି ଆଦର୍ଶକୁ ପାଥେୟ କରି ଲାଞ୍ଜିଗଡ଼ ତହସିଲଦାର ବନମାଳୀ ମେହେର, ଲାଞ୍ଜିଗଡ଼ ରାଜସ୍ୱ ନିରୀକ୍ଷକ ତାପସ କୁମାର ମିଶ୍ର ତ୍ରିଲୋଚନପୁର, ଜଗନ୍ନାଥ ପୁର ଓ ଲାଞ୍ଜିଗଡ଼ ପଞ୍ଚାୟତର ବେଲଗୁଡ଼ା, ଅମ୍ବାଗୁଡ଼ା, ଖାଲଗୁଡ଼ା, ବାନିଗାଁ, ଜଗନ୍ନାଥପୁର ଏବଂ ଗୋଇପଟା ଆଦି ଗ୍ରାମଗୁଡ଼ିକ ଗସ୍ତ କରିଥିଲେ। ଦୀର୍ଘ ଦିନ ଧରି ଭୂମିହୀନ ହୋଇ ଅବହେଳିତ ଜୀବନ ବିତାଉଥିବା ୯୨ ଟି ପରିବାରଙ୍କୁ ୪ ଡେସିମିଲ ଲେଖାଏଁ ସ୍ଥାୟୀ ଘରଡ଼ିହ ପଟ୍ଟା ଆବଣ୍ଟନ କରି ସେମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିଛନ୍ତି। ଏହା ଫଳ ରେ ଏହି ୯୨ ଟି ପରିବାର ଏବେ ‘ପ୍ରଧାନମନ୍ତ୍ରୀ ଆବାସ ଯୋଜନା’ (ପି.ଏମ୍.ଏ.ୱାଇ) କିମ୍ବା ରାଜ୍ୟ ସରକାରଙ୍କ ଗୃହ ନିର୍ମାଣ ଯୋଜନାରେ ସାମିଲ ହେବା ପାଇଁ ଯୋଗ୍ୟ ବିବେଚିତ ହେବେ।ଯାହା ସେମାନଙ୍କ ଜୀବନଧାରାରେ ଏକ ବଡ଼ ପରିବର୍ତ୍ତନ ଆଣିବ। ପଟ୍ଟା ବଣ୍ଟନ ଅବସରରେ ତହସିଲଦାର କହିଛନ୍ତି, ସରକାରୀ ଯୋଜନାର ସଫଳ ରୂପାୟନ କେବଳ କାର୍ଯ୍ୟାଳୟର ଚାରି କାନ୍ଥ ଭିତରେ ସୀମିତ ନୁହେଁ। ଆମର ଉଦ୍ୟମ ହେଉଛି ପ୍ରତ୍ୟେକ ଗରିବ ପରିବାରଙ୍କୁ ସେମାନଙ୍କର ସାମ୍ବିଧାନିକ ଅଧିକାର ଓ ସୁରକ୍ଷା ପ୍ରଦାନ କରିବା। ହିତାଧିକାରୀଙ୍କ ମୁହଁରେ ଥିବା ଏହି ଆତ୍ମସନ୍ତୋଷ ହିଁ ଜଣେ ସରକାରୀ ଅଧିକାରୀ ପାଇଁ ସବୁଠାରୁ ବଡ଼ ପୁରସ୍କାର। ପ୍ରଶାସନ ସର୍ବଦା ଜନସାଧାରଣଙ୍କ ସେବାରେ ନିୟୋଜିତ ରହିବାକୁ ପ୍ରତିଶ୍ରୁତିବଦ୍ଧ।ଲାଞ୍ଜିଗଡ଼ ପ୍ରଶାସନର ଏହି ପ୍ରୟାସକୁ ସ୍ଥାନୀୟ ଅଞ୍ଚଳରେ ବେଶ୍ ସ୍ୱାଗତ କରାଯାଇଛି। ଆଗାମୀ ଦିନରେ ଅନ୍ୟ ଭୂମିହୀନମାନଙ୍କୁ ମଧ୍ୟ ଏହିପରି ଭାବେ ଚିହ୍ନଟ କରି ପଟ୍ଟା ପ୍ରଦାନ କରାଯିବ ବୋଲି ପ୍ରଶାସନିକ ସୂତ୍ରରୁ ସୂଚନା ମିଳିଛି।
ବ୍ରେକିଂ ଖବର
