କଣ୍ଟାମାଳ/କ୍ରାନ୍ତିକ୍ଷେତ୍ର (ମନଧର କର୍ମୀ) : କର୍ତ୍ତବ୍ୟ ସମ୍ପାଦନ କରୁଥିବା ସମୟରେ ବଜ୍ରାଘାତର ଶିକାର ହୋଇ କଣ୍ଟାମାଳ ବ୍ଲକର ଅବକାରୀ ଉପ-ନିରୀକ୍ଷକ (ସବ୍-ଇନ୍ସପେକ୍ଟର) ପୁରୁଷୋତ୍ତମ ବେବର୍ତ୍ତାଙ୍କ ଅକାଳ ମୃତ୍ୟୁ ଘଟିଛି। ଏହି ଦୁଃଖଦ ଘଟଣାରେ ଅବକାରୀ ବିଭାଗ ସମେତ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ସୂଚନା ଅନୁଯାୟୀ, ଆଜି ସନ୍ଧ୍ୟା ସମୟରେ ପୁରୁଷୋତ୍ତମ ବେବର୍ତ୍ତା ନିଜ ଷ୍ଟାଫଙ୍କ ସହ କଣ୍ଟାମାଳ ବ୍ଲକ ଅନ୍ତର୍ଗତ ଗୁଚ୍ଛଗୁରା ଅଞ୍ଚଳକୁ ପେଟ୍ରୋଲିଂ ଓ କର୍ତ୍ତବ୍ୟ ସମ୍ପାଦନ ପାଇଁ ଯାଇଥିଲେ। ଏହି ସମୟରେ ହଠାତ୍ ବଜ୍ରପାତ ହେବାରୁ ସେ ଏହାର ଶିକାର ହୋଇଥିଲେ। ବଜ୍ରାଘାତରେ ସେ ଗୁରୁତର ହୋଇପଡ଼ିବା ପରେ ସାଙ୍ଗରେ ଥିବା ଷ୍ଟାଫ ଓ ସହକର୍ମୀମାନେ ତୁରନ୍ତ ତାଙ୍କୁ ଉଦ୍ଧାର କରି କଣ୍ଟାମାଳ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତରମାନେ ତାଙ୍କର ଚିକିତ୍ସା କରିଥିଲେ ମଧ୍ୟ ଶେଷରେ ତାଙ୍କୁ ମୃତ ଘୋଷଣା କରିଥିଲେ। କର୍ତ୍ତବ୍ୟରତ ଅବସ୍ଥାରେ ଜଣେ ନିଷ୍ଠାପର ଅବକାରୀ କର୍ମଚାରୀଙ୍କ ଏଭଳି ଅଚାନକ ମୃତ୍ୟୁ ଘଟଣା ତାଙ୍କ ସହକର୍ମୀ, ପରିଚିତ ଓ ସ୍ଥାନୀୟ ଲୋକଙ୍କୁ ସ୍ତବ୍ଧ କରିଦେଇଛି। ଦାୟିତ୍ୱବୋଧର ସହିତ ପେଟ୍ରୋଲିଂରେ ନିୟୋଜିତ ଥିବା ବେଳେ ପ୍ରାକୃତିକ ବିପର୍ଯ୍ୟୟର ଶିକାର ହୋଇ ତାଙ୍କର ଜୀବନ ଚାଲିଯିବା ଘଟଣା ଅତ୍ୟନ୍ତ ମର୍ମାହତ କରିଛି। ତାଙ୍କ ଅସମୟ ମୃତ୍ୟୁର ଖବର ପ୍ରଚାର ହେବା ପରେ ଅବକାରୀ ବିଭାଗର କର୍ମଚାରୀ ଓ ଅଧିକାରୀମାନଙ୍କ ମଧ୍ୟରେ ଗଭୀର ଶୋକ ପ୍ରକାଶ ପାଇଛି। ଏପରିକି ସ୍ଥାନୀୟ ଅଞ୍ଚଳରେ ମଧ୍ୟ ଏହି ଦୁଃଖଦ ଘଟଣାକୁ ନେଇ ଶୋକର ପରିବେଶ ସୃଷ୍ଟି ହୋଇଛି। କର୍ତ୍ତବ୍ୟ ପାଳନ କରୁଥିବା ସମୟରେ ଜଣେ ଅଧିକାରୀଙ୍କ ଜୀବନ ହଠାତ୍ ଦୀପଶିଖା ପରି ଲିଭିଯିବା ସମସ୍ତଙ୍କ ମନରେ ଗଭୀର ଦୁଃଖର ଛାପ ଛାଡ଼ିଯାଇଛି। ପୁରୁଷୋତ୍ତମ ବେବର୍ତ୍ତାଙ୍କ ଅକାଳ ବିୟୋଗରେ ଅବକାରୀ ବିଭାଗ ଜଣେ ଦାୟିତ୍ୱବାନ କର୍ମଚାରୀଙ୍କୁ ହରାଇଥିବା ବେଳେ ତାଙ୍କ ପରିବାର ହରାଇଛି ଜଣେ ନିଜର ଲୋକଙ୍କୁ। ତାଙ୍କ ବିୟୋଗରେ ଶୋକସନ୍ତପ୍ତ ପରିବାରବର୍ଗ, ସହକର୍ମୀ ଓ ଶୁଭେଚ୍ଛୁମାନଙ୍କ ମଧ୍ୟରେ ଗଭୀର ଶୋକ ପ୍ରକାଶ ପାଇଛି। ସମସ୍ତେ ଦିବଙ୍ଗତ ପୁରୁଷୋତ୍ତମ ବେବର୍ତ୍ତାଙ୍କ ଅମର ଆତ୍ମାର ସଦ୍ଗତି କାମନା କରିବା ସହ ଶୋକସନ୍ତପ୍ତ ପରିବାରକୁ ଏହି ଅପୂରଣୀୟ ଦୁଃଖକୁ ସହିବା ପାଇଁ ଭଗବାନ ଧୈର୍ଯ୍ୟ ଓ ଶକ୍ତି ପ୍ରଦାନ କରନ୍ତୁ ବୋଲି ପ୍ରାର୍ଥନା କରିଛନ୍ତି।
ବ୍ରେକିଂ ଖବର