ଥୁଆମୂଳ ରାମପୁର/କ୍ରାନ୍ତିକ୍ଷେତ୍ର: ଲଘୁଚାପଜନିତ ଲଗାଣ ବର୍ଷାରେ କଳାହାଣ୍ଡି ଜିଲ୍ଲାର ଦୁର୍ଗମ ଥୁଆମୂଳ ରାମପୁର ବ୍ଲକ ଅଞ୍ଚଳରେ ଜନଜୀବନ ପ୍ରଭାବିତ ହୋଇଥିବାବେଳେ, କେରପାଇ ଗ୍ରାମ ପଞ୍ଚାୟତ ଅନ୍ତର୍ଗତ ମାଝୀଗାଁରେ ଜଣେ ଗରିବ ଆଦିବାସୀ ପରିବାରର ଘରର କାନ୍ଥ ଭୁଷୁଡ଼ି ପଡ଼ିଛି। ବୁଧବାର ବିଳମ୍ବିତ ରାତିରେ ଘଟିଥିବା ଏହି ଘଟଣାରେ ପରିବାରର ୪ ସଦସ୍ୟ ଅଳ୍ପକେ ବିପଦରୁ ବର୍ତ୍ତି ଯାଇଥିବା ଜଣାପଡ଼ିଛି।ମାଝୀଗାଁର ଗୁରୁବାରୁ ମାଝୀଙ୍କ ଚାଳମାଟି ଘରେ ଗୁରୁବାରୁଙ୍କ ସମେତ ତାଙ୍କ ସ୍ତ୍ରୀ ରୁପଏ ମାଝୀ ଏବଂ ଦୁଇ ପୁଅ ଦେବସିଂ ଓ କାଲାର୍ ସିଂ ବସବାସ କରୁଥିଲେ। ଲଗାଣ ବର୍ଷା ଯୋଗୁଁ ମାଟି କାନ୍ଥ ଦୁର୍ବଳ ହୋଇ ବୁଧବାର ବିଳମ୍ବିତ ରାତିରେ ହଠାତ୍ ଭୁଷୁଡ଼ି ପଡ଼ିଥିଲା। ତେବେ ସୌଭାଗ୍ୟବଶତଃ ପରିବାରର କୌଣସି ସଦସ୍ୟ ଏଥିରେ ଆହତ ହୋଇନଥିବା ଜଣାପଡ଼ିଛି। ଘଟଣା ସମ୍ପର୍କରେ କେରପାଇ ନାଏବ ସରପଞ୍ଚ ମୁଗ୍ରି ମାଝୀ ଗଣମାଧ୍ୟମକୁ ସୂଚନା ଦେଇଛନ୍ତି। ଘରର କାନ୍ଥ ଭୁଷୁଡ଼ି ପଡ଼ିବା ପରେ ଗୁରୁବାରୁଙ୍କ ପରିବାର ବାସସ୍ଥାନକୁ ନେଇ ଚିନ୍ତାରେ ପଡ଼ିଛି। ଘରର ଅବଶିଷ୍ଟ ଅଂଶ ମଧ୍ୟ ଦୁର୍ବଳ ରହିଥିବାରୁ ପରବର୍ତ୍ତୀ ବର୍ଷାରେ ଅଧିକ କ୍ଷତି ହେବାର ଆଶଙ୍କା ରହିଛି। ଦୁର୍ଗମ ଅଞ୍ଚଳରେ ଏଭଳି ଅନେକ ଗରିବ ପରିବାର ଏବେ ବି ଚାଳ ଓ ମାଟି ଘର ଉପରେ ନିର୍ଭରଶୀଳ। ବର୍ଷା ଋତୁ ଆସିଲେ ଦୁର୍ବଳ ମାଟି କାନ୍ଥ ଓ ଛାତ ଭୁଷୁଡ଼ିବାର ଭୟ ସେମାନଙ୍କୁ ଘାରିଥାଏ। ବିଶେଷକରି ଲଗାଣ ବର୍ଷା ସମୟରେ ଘର ଭିତରେ ରହିବା ମଧ୍ୟ ଅନେକ ପରିବାର ପାଇଁ ବିପଦପୂର୍ଣ୍ଣ ହୋଇପଡ଼େ। ଗୁରୁବାରୁ ମାଝୀଙ୍କ ପରିବାରର ଘରର କାନ୍ଥ ଭୁଷୁଡ଼ିବା ଘଟଣା ପରେ ସ୍ଥାନୀୟ ଲୋକେ ପ୍ରଶାସନ ପକ୍ଷରୁ ଘଟଣାସ୍ଥଳ ପରିଦର୍ଶନ କରି କ୍ଷୟକ୍ଷତିର ଆକଳନ କରିବା ସହ ଆବଶ୍ୟକ ସହାୟତା ଯୋଗାଇଦେବାକୁ ଦାବି କରିଛନ୍ତି। ବର୍ଷା ଦିନରେ ପରିବାରଟି ଯେପରି ଅସୁରକ୍ଷିତ ଅବସ୍ଥାରେ ନ ରହେ, ସେଥିପାଇଁ ତୁରନ୍ତ ବିକଳ୍ପ ଆଶ୍ରୟ ଓ ଆବଶ୍ୟକ ସରକାରୀ ସହାୟତା ଯୋଗାଇଦେବା ନେଇ ଦାବି ଉଠିଛି। ଏପରିସ୍ଥିତିରେ ଗୁରୁବାରୁଙ୍କ ପରିବାରକୁ ଆବାସ ଯୋଜନା କିମ୍ବା ଅନ୍ୟାନ୍ୟ ଯୋଗ୍ୟ ସରକାରୀ ସହାୟତାରେ ସାମିଲ କରାଯାଇଛି କି ନାହିଁ, ତାହାର ଯାଞ୍ଚ କରି ଯୋଗ୍ୟତା ଅନୁସାରେ ସହାୟତା ଯୋଗାଇଦେବା ଆବଶ୍ୟକତା ରହିଛି। ବର୍ଷା ଜାରି ରହିଲେ ଅବଶିଷ୍ଟ ଘର ଅଂଶ ମଧ୍ୟ ଭୁଷୁଡ଼ିବାର ଆଶଙ୍କା ଥିବାରୁ ପରିବାରର ସୁରକ୍ଷାକୁ ପ୍ରାଥମିକତା ଦେବାକୁ ସ୍ଥାନୀୟ ଲୋକେ ଅନୁରୋଧ କରିଛନ୍ତି।
ବ୍ରେକିଂ ଖବର