ରାୟଗଡା/କ୍ରାନ୍ତିକ୍ଷେତ୍ର (ପ୍ରଶାନ୍ତ କୁମାର ସେନାପତି) : ପବିତ୍ର ଶ୍ରାବଣ ମାସର ପ୍ରଥମ ସୋମବାର ଅବସରରେ ରାୟଗଡ଼ା ଜିଲ୍ଲା କଲ୍ୟାଣସିଂହପୁର ସ୍ଥିତ ଐତିହାସିକ ଦେବଗିରି ଶୈବପୀଠ ଉତ୍ସବମୁଖର ହୋଇଉଠିଛି। ହାତୀ ଆକୃତିର ବିଶାଳ ପାହାଡ଼ ଉପରେ ଥିବା ପ୍ରାକୃତିକ ଗୁମ୍ଫାରେ ବିରାଜମାନ ବାବା ପଞ୍ଚମୁଖେଶ୍ୱରଙ୍କ ନିକଟରେ ଜଳାଭିଷେକ କରିବା ପାଇଁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଛି। ସକାଳୁ ଗେରୁଆ ବସ୍ତ୍ରଧାରୀ କାଉଡ଼ିଆମାନେ ନିକଟସ୍ଥ ନାଗାବଳୀ ନଦୀରୁ ମନ୍ତ୍ରୋଚ୍ଚାରଣ ପୂର୍ବକ ପବିତ୍ର ଜଳ ଉଠାଇଥିଲେ। ପରେ ‘ହର ହର ମହାଦେବ’ ଓ ‘ବୋଲବମ୍’ ନାଦରେ ଗଗନପବନ କମ୍ପାଇ ଦେବଗିରି ଅଭିମୁଖେ ପଦଯାତ୍ରା କରିଥିଲେ। ଦେବଗିରି ପାହାଡ଼ ଚଢ଼ି ଭକ୍ତମାନେ ଅତ୍ୟନ୍ତ ଶୃଙ୍ଖଳିତ ଭାବେ ବାବା ପଞ୍ଚମୁଖେଶ୍ୱରଙ୍କ ମସ୍ତକରେ ଜଳାଭିଷେକ କରିବା ସହ ଆଶୀର୍ବାଦ ଭିକ୍ଷା କରିଥିଲେ। ଏହି କାଉଡ଼ିଆ ଯାତ୍ରାରେ କେବଳ ଓଡ଼ିଶା ନୁହେଁ, ବରଂ ପଡ଼ୋଶୀ ଆନ୍ଧ୍ରପ୍ରଦେଶ ଓ ଛତିଶଗଡ଼ରୁ ଶହ ଶହ ଶ୍ରଦ୍ଧାଳୁ ଯୋଗଦେଇ ଆଧ୍ୟାତ୍ମିକ ପରିବେଶକୁ ଆହୁରି ସମୃଦ୍ଧ କରିଛନ୍ତି। ଅନ୍ୟପଟେ, ଶ୍ରାବଣ ସୋମବାରକୁ ଆଖିଆଗରେ ରଖି କଲ୍ୟାଣସିଂହପୁରର ସ୍ଥାନୀୟ ଯୁବକମାନଙ୍କ ଦ୍ୱାରା ବ୍ୟାପକ ସେବା କାର୍ଯ୍ୟକ୍ରମ ହାତକୁ ନିଆଯାଇଛି। କାଉଡ଼ିଆମାନଙ୍କ ପାଇଁ ବିଶ୍ରାମ, ପାନୀୟ ଜଳ, ସରବତ ଓ ମାଗଣା ପ୍ରସାଦ ସେବନର ସୁବ୍ୟବସ୍ଥା କରାଯାଇଥିବା ଦେଖିବାକୁ ମିଳିଛି। ସମଗ୍ର ଅଞ୍ଚଳରେ ଏବେ ଏକ ଆଧ୍ୟାତ୍ମିକ ଓ ଭକ୍ତିମୟ ମାହୋଲ ସୃଷ୍ଟି ହୋଇଛି।
ବ୍ରେକିଂ ଖବର