ଧର୍ମଗଡ଼/କ୍ରାନ୍ତିକ୍ଷେତ୍ର : ଧର୍ମଗଡ଼ ଅବକାରୀ ଥାନା ଅନ୍ତର୍ଗତ ବୁଢ଼ୀମୁଣ୍ଡା କେନାଲ ରାସ୍ତା ଦେଇ ଦେଶୀ ହାତରନ୍ଧା ମଦ ଚାଲାଣ ହେଉଥିବା ବେଳେ ଧର୍ମଗଡ଼ ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ଜଣେ ଯୁବକଙ୍କୁ ଗିରଫ କରିବା ସହ ତାଙ୍କ ନିକଟରୁ ୧୭ ଲିଟର ଦେଶୀ ହାତରନ୍ଧା ମଦ ଏବଂ ମଦ ପରିବହନରେ ବ୍ୟବହୃତ ସ୍କୁଟି ଜବତ କରିଛନ୍ତି। ଗିରଫ ଯୁବକ ହେଲେ ଧର୍ମଗଡ ଥାନା ତେନ୍ତୁଳିପଡା ର ସୋମ୍ୟରଞ୍ଜନ ନିଆଲ (୧୯)। ଅବକାରୀ ଆଇନ ଅନୁଯାୟୀ ଏକ ମାମଲା ରୁଜୁ କରାଯାଇ ପଚରା ଉଚୁରା ପରେ ଅଭିଯୁକ୍ତଙ୍କୁ ଧର୍ମଗଡ କୋର୍ଟ ଚାଲାଣ କରାଯାଇଥିବା ଧର୍ମଗଡ଼ ଅବକାରୀ ଅଧିକାରୀ ଅରୁଣ କୁମାର ଯୋଶୀ ସୂଚନା ଦେଇଛନ୍ତି। ଚଢ଼ାଓ ସମୟରେ ଅବକାରୀ ଅଧିକାରୀ ଶ୍ରୀଯୋଶୀ ସମେତ, ଅବକାରୀ ସବ୍-ଇନ୍ସପେକ୍ଟର ପ୍ରତିମା ବେହେରା, କନେଷ୍ଟବଳ ଯଶୋବନ୍ତି ଭୋଇ, କର୍ଣ୍ଣ ବାଗ ଓ ରବି ନାଗ ପ୍ରମୁଖ ସାମିଲ ଥିଲେ। ଅବୈଧ ମଦ କାରବାରକୁ ରୋକିବା ପାଇଁ ଆଗାମୀ ଦିନରେ ଏଭଳି ଚଢ଼ାଉ ଓ କଡ଼ା ଯାଞ୍ଚ ଅଭିଯାନ ଜାରି ରହିବ ବୋଲି ଅବକାରୀ ବିଭାଗ ପକ୍ଷରୁ କୁହାଯାଇଛି।
