ଥୁଆମୂଳ ରାମପୁର/କ୍ରାନ୍ତିକ୍ଷେତ୍ର : ଲଘୁଚାପ ପ୍ରଭାବରେ କଳାହାଣ୍ଡି ଜିଲ୍ଲାରେ ଲାଗି ରହିଛି ଲଗାଣ ବର୍ଷା। ପ୍ରବଳ ବର୍ଷାରେ ଜିଲ୍ଲାର ଅନେକ ଅଞ୍ଚଳ ପ୍ରଭାବିତ ହୋଇଥିବା ବେଳେ ଦୁର୍ଗମ ଥୁଆମୂଳ ରାମପୁର ବ୍ଲକରେ ପରିସ୍ଥିତି ସବୁଠାରୁ ଅଧିକ ଗମ୍ଭୀର ହୋଇପଡ଼ିଛି। ଗତ ୨୪ ଘଣ୍ଟାରେ ଥୁଆମୂଳ ରାମପୁରରେ ୩୪୫ ମିଲିମିଟର ବର୍ଷା ରେକର୍ଡ ହୋଇଛି। ଜିଲ୍ଲାର ଅନ୍ୟାନ୍ୟ ବ୍ଲକ ତୁଳନାରେ ମଧ୍ୟ ଥୁଆମୂଳ ରାମପୁରରେ ବର୍ଷାର ପରିମାଣ ଯଥେଷ୍ଟ ଅଧିକ ରହିଛି। ଜୟପାଟଣାରେ ୨୦୦ ମି.ମି., କଲମପୁରରେ ୧୪୬.୪ ମି.ମି., ଜୁନାଗଡ଼ରେ ୧୦୫.୬ ମି.ମି., କୋକସରାରେ ୧୦୨ ମି.ମି., ଧର୍ମଗଡ଼ରେ ୪୦.୩ ମି.ମି., ଲାଞ୍ଜିଗଡ଼ରେ ୨୩.୬ ମି.ମି., ଭବାନୀପାଟଣାରେ ୨୦.୮ ମି.ମି., ଗୋଲାମୁଣ୍ଡାରେ ୧୪ ମି.ମି., ମ.ରାମପୁରରେ ୯ ମି.ମି., ନର୍ଲାରେ ୭ ମି.ମି., କର୍ଲାମୁଣ୍ଡାରେ ୬ ମି.ମି. ଏବଂ କେସିଙ୍ଗାରେ ୩.୪ ମି.ମି. ବର୍ଷା ରେକର୍ଡ ହୋଇଛି। ଲଗାଣ ବର୍ଷାର ପ୍ରଭାବରେ ଥୁଆମୂଳ ରାମପୁର ଅଞ୍ଚଳର ନଦୀ, ନାଳ ଓ ଝରଣାଗୁଡ଼ିକ ଫୁଲି ଉଠିଛି। ଇନ୍ଦ୍ରାବତୀ ନଦୀର ଜଳସ୍ତର ବଢ଼ିବା ଯୋଗୁଁ ନଦୀ ପୋଲ ଉପରେ ପାଣି ପ୍ରବାହିତ ହେଉଛି। ଫଳରେ ଥୁଆମୂଳ ରାମପୁର-ରାୟଗଡ଼ା ଯାତାୟତ ବାଧାପ୍ରାପ୍ତ ହୋଇଛି। ପ୍ରବଳ ବର୍ଷା ଯୋଗୁଁ ଥୁଆମୂଳ ରାମପୁର ଓ ସିଲେଟ ପଞ୍ଚାୟତ ମଧ୍ୟରେ ମଧ୍ୟ ଯୋଗାଯୋଗ ବିଚ୍ଛିନ୍ନ ହୋଇଥିବା ଜଣାପଡ଼ିଛି। ଅନେକ ଗ୍ରାମବାସୀ ଜରୁରୀ କାମରେ ମଧ୍ୟ ବାହାରକୁ ଯାଇପାରୁନାହାନ୍ତି। ଅସମ୍ପୂର୍ଣ୍ଣ ପୋଲ ଯୋଗୁଁ କାଚେଲେଖା-କେରପାଇ ଯାତାୟତ ଠପ୍। ଅନ୍ୟପଟେ ଅସମ୍ପୂର୍ଣ୍ଣ ପୋଲ ନିର୍ମାଣ ଏବେ ବର୍ଷା ସମୟରେ ଅଞ୍ଚଳବାସୀଙ୍କ ପାଇଁ ବଡ଼ ସମସ୍ୟା ପାଲଟିଛି। ପୋଲ ନିର୍ମାଣ ସମ୍ପୂର୍ଣ୍ଣ ହୋଇନଥିବାରୁ କାଚେଲେଖା-କେରପାଇ ଯାତାୟତ ଠପ୍ ହୋଇଯାଇଛି। ସେହିପରି କାଣିଗୁମା ଠାରୁ ନେହେଲା ଓ ତାରା ଗାଁକୁ ସଂଯୋଗ କରୁଥିବା ରାସ୍ତାର ଅବସ୍ଥା ମଧ୍ୟ ଅତ୍ୟନ୍ତ ଶୋଚନୀୟ ହୋଇପଡ଼ିଛି। ପ୍ରବଳ ବର୍ଷାରେ ରାସ୍ତା ଅଧିକ ବିପଜ୍ଜନକ ହୋଇଥିବାରୁ ଯାତାୟତ କରିବା ଲୋକଙ୍କ ପାଇଁ ବିପଦପୂର୍ଣ୍ଣ ହୋଇଛି। କର୍ଲାପାଟ ପଞ୍ଚାୟତର ଅମଠାଗୁଡ଼ାରୁ କୁଆଙ୍ଗ ଗାଁକୁ ଏଯାଏଁ ସବୁଦିନିଆ ରାସ୍ତା ନଥିବାରୁ ବର୍ଷା ଦିନରେ ସ୍ଥିତି ଆହୁରି ଦୟନୀୟ ହୋଇପଡ଼ିଛି। ରାସ୍ତା ନଥିବାରୁ ଜରୁରୀ ସମୟରେ ଆମ୍ବୁଲାନ୍ସ ସେବା ମଧ୍ୟ ଅପହଞ୍ଚ ହୋଇଯାଉଥିବା ଅଭିଯୋଗ ରହିଛି। ପୋଡ଼ାପଦରର ୧୬ ଗାଁକୁ ଡଙ୍ଗା ହିଁ ଭରସା, ବର୍ଷାରେ ଡଙ୍ଗା ଚଳାଚଳ ବନ୍ଦ। ଇନ୍ଦ୍ରାବତୀ ଜଳଭଣ୍ଡାର ଯୋଗୁଁ ଜଳବନ୍ଦୀ ହୋଇ ରହିଥିବା ପୋଡ଼ାପଦର ପଞ୍ଚାୟତର ଏହି ଗାଁ ଗୁଡିକ ପାଇଁ ଡଙ୍ଗା ହିଁ ଏକମାତ୍ର ଯାତାୟତର ମାଧ୍ୟମ। ହେଲେ ଲଗାଣ ବର୍ଷା ଯୋଗୁଁ ଡଙ୍ଗା ଚଳାଚଳ ମଧ୍ୟ ବନ୍ଦ ହୋଇଯାଇଛି। ଫଳରେ ଏହି ଅଞ୍ଚଳର ଲୋକେ ଏକପ୍ରକାର ଜଳବନ୍ଦୀ ଜୀବନ ବିତାଉଛନ୍ତି। ଅସୁସ୍ଥ ବ୍ୟକ୍ତିଙ୍କୁ ଚିକିତ୍ସାଳୟ ନେବା ଠାରୁ ଆରମ୍ଭ କରି ଅତ୍ୟାବଶ୍ୟକ ସାମଗ୍ରୀ ଆଣିବା ପର୍ଯ୍ୟନ୍ତ ସବୁକିଛି ପ୍ରଭାବିତ ହୋଇଛି। ଏଭଳି ପରିସ୍ଥିତିରେ ପୋଡ଼ାପଦର ଅଞ୍ଚଳବାସୀ ଭଗବାନଙ୍କ ଭରସାରେ ଜୀବନ କାଟୁଥିବା ଅଭିଯୋଗ କରିଛନ୍ତି। ପ୍ରବଳ ବର୍ଷାରେ ବ୍ଲକର ଅନେକ ବିଦ୍ୟାଳୟ ଓ ଅଙ୍ଗନବାଡ଼ି କେନ୍ଦ୍ର ମଧ୍ୟ ଅସୁରକ୍ଷିତ ଅବସ୍ଥାରେ ରହିଛି। ବିଭିନ୍ନ ବିଦ୍ୟାଳୟର ଛାତରୁ ପାଣି ଝରୁଥିବାରୁ ଛାତ୍ରଛାତ୍ରୀ ଓ ଶିକ୍ଷକମାନଙ୍କ ସୁରକ୍ଷା ନେଇ ପ୍ରଶ୍ନ ଉଠିଛି। ଦୀର୍ଘଦିନ ଧରି ରକ୍ଷଣାବେକ୍ଷଣ ଅଭାବରେ ଥିବା ଏଭଳି ଶିକ୍ଷାନୁଷ୍ଠାନଗୁଡ଼ିକ ବର୍ଷାରେ ଆହୁରି ଦୁର୍ବଳ ହୋଇପଡ଼ିଛି। ଲଗାଣ ବର୍ଷାର ସବୁଠାରୁ ଅଧିକ ପ୍ରଭାବ ପଡ଼ିଛି ଗରିବ ଓ ଦୁର୍ବଳ ପରିବାରଙ୍କ ଉପରେ। ବର୍ଷା ଓ ପବନରେ ବିଭିନ୍ନ ସ୍ଥାନରେ କୁଡ଼ିଆ ଘର ଭାଙ୍ଗିପଡ଼ିଥିବା ବେଳେ ଅନେକ ପରିବାରଙ୍କ ଘରେ ପାଣି ପଶିଛି। ଫଳରେ ଲୋକେ ନିଜ ଜୀବନ ଓ ଜୀବିକା ନେଇ ଚିନ୍ତିତ ହୋଇପଡ଼ିଛନ୍ତି। ଏହା ସହିତ ପ୍ରବଳ ବର୍ଷାରେ ବିଭିନ୍ନ ଅଞ୍ଚଳରେ ଚାଷଜମିରେ ପାଣି ଭରିଯିବାରୁ ବିଭିନ୍ନ ଫସଲ ନଷ୍ଟ ହୋଇଛି। ଚାଷୀଙ୍କ କ୍ଷୟକ୍ଷତିର ତୁରନ୍ତ ଆକଳନ କରି ସରକାରୀ ସହାୟତା ଓ କ୍ଷତିପୂରଣ ଦେବାକୁ ଦାବି ହୋଇଛି। ଥୁଆମୂଳ ରାମପୁର ଭଳି ଦୁର୍ଗମ ଓ ପାହାଡ଼ିଆ ଅଞ୍ଚଳରେ ପ୍ରବଳ ବର୍ଷା ସମୟରେ ରାସ୍ତାଘାଟ, ପୋଲ, ନଦୀ ଓ ନାଳର ସ୍ଥିତି ଅତ୍ୟନ୍ତ ସମ୍ବେଦନଶୀଳ ହୋଇପଡ଼େ। ଏଭଳି ସ୍ଥିତିରେ ପ୍ରଭାବିତ ଗାଁଗୁଡ଼ିକରେ ପ୍ରଶାସନିକ ଟିମ୍ ପଠାଇ କ୍ଷୟକ୍ଷତିର ତୁରନ୍ତ ଆକଳନ କରିବା ସହ ଆବଶ୍ୟକ ସ୍ଥାନରେ ଉଦ୍ଧାର ଓ ରିଲିଫ୍ ବ୍ୟବସ୍ଥା କରିବା ଜରୁରୀ ହୋଇପଡ଼ିଛି। ୩୪୫ ମିଲିମିଟର ବର୍ଷାରେ ଥୁଆମୂଳ ରାମପୁରର ବାସ୍ତବ ଚିତ୍ର ଏବେ ସାମ୍ନାକୁ ଆସିଛି। ବର୍ଷା କମିବା ପର୍ଯ୍ୟନ୍ତ ନଦୀ ଓ ନାଳ ପାର ନକରିବା, ବିପଦପୂର୍ଣ୍ଣ ରାସ୍ତାରେ ଯାତାୟତ ନକରିବା ଏବଂ ପ୍ରଶାସନର ନିର୍ଦ୍ଦେଶ ମାନିବାକୁ ଅଞ୍ଚଳବାସୀଙ୍କୁ ଆହ୍ୱାନ କରାଯାଇଛି।
ବ୍ରେକିଂ ଖବର