ଝରିଗାଁ/କ୍ରାନ୍ତିକ୍ଷେତ୍ର (ଭୋଦେବ ଗୌଡ଼) : ନବରଙ୍ଗପୁର ଜିଲ୍ଲା ଝରିଗାଁ ଥାନା ଅନ୍ତର୍ଗତ ବେଲଗାଁ ନିକଟସ୍ଥ ଜଙ୍ଗଲ ମଧ୍ୟରେ ଚାଲିଥିବା ଖୁଡୁଖୁଡ଼ି ଜୁଆ ଉପରେ ଝରିଗାଁ ପୋଲିସ ଚଢ଼ାଉ କରିଛି। ବିଶେଷ ସୂତ୍ରରୁ ସୂଚନା ପାଇ ଥାନା ଅଧିକାରୀ ରୋଚିତା ମାଡକାମୀଙ୍କ ନେତୃତ୍ୱରେ ପୋଲିସ ଟିମ୍ ଅଚାନକ ଚଢ଼ାଉ କରି ଜୁଆ ଖେଳରେ ସାମିଲ ଥିବା ଦୁଇ ଜଣଙ୍କୁ ଧରିଥିବା ଜଣାପଡ଼ିଛି। ଚଢ଼ାଉ ସମୟରେ ଜୁଆ ଖେଳରେ ବ୍ୟବହୃତ ପଟି, ଗୋଟି ଏବଂ ୨,୯୫୦ ଟଙ୍କା ନଗଦ ଜବତ କରାଯାଇଥିବା ପୋଲିସ ସୂତ୍ରରୁ ଜଣାପଡ଼ିଛି। ଘଟଣାକୁ ନେଇ ପୋଲିସ ପକ୍ଷରୁ ଆଇନ ଅନୁଯାୟୀ ପଦକ୍ଷେପ ନିଆଯାଉଥିବା ସୂଚନା ମିଳିଛି।ଅନ୍ୟପକ୍ଷରେ, ଝରିଗାଁ ଅଞ୍ଚଳରେ ଜୁଆ ଖେଳ ବଢ଼ୁଥିବା ନେଇ ସ୍ଥାନୀୟ ମହଲରେ ଚିନ୍ତା ପ୍ରକାଶ ପାଇଛି। ସାପ୍ତାହିକ ହାଟ ସମେତ ବିଭିନ୍ନ ଅଞ୍ଚଳର ଜଙ୍ଗଲ ଓ ନିର୍ଜନ ସ୍ଥାନରେ ଜୁଆ ଖେଳ ଚାଲୁଥିବା ନେଇ ଅଭିଯୋଗ ହେଉଛି। ତେବେ ଏହି ବ୍ୟାପକ ଅଭିଯୋଗର ସ୍ୱତନ୍ତ୍ର ଭାବେ ସତ୍ୟତା ଯାଞ୍ଚ ହୋଇନାହିଁ। ଜୁଆ ରୋକିବା ପାଇଁ ପୋଲିସର ଚଢ଼ାଉକୁ ସ୍ଥାନୀୟ ଲୋକେ ସ୍ୱାଗତ କରିଛନ୍ତି। ତେବେ ଚଢ଼ାଉ ପରେ କେବଳ ଜରିମାନା କରି ଜୁଆଡ଼ିଙ୍କୁ ଛାଡ଼ି ଦିଆଯାଉଥିବା ଏବଂ ପରେ ସେମାନେ ପୁଣି ଜୁଆରେ ସାମିଲ ହେଉଥିବା ନେଇ କେତେକ ସ୍ଥାନୀୟଙ୍କ ପକ୍ଷରୁ ଅଭିଯୋଗ ରହିଛି। ତେବେ ଏହି ଅଭିଯୋଗର ମଧ୍ୟ ସ୍ୱତନ୍ତ୍ର ଯାଞ୍ଚ ହୋଇନଥିବାରୁ ଏହାର ସତ୍ୟତା ସ୍ପଷ୍ଟ ନୁହେଁ। ଅଞ୍ଚଳରେ ଜୁଆ ଖେଳ ରୋକିବା ପାଇଁ ନିୟମିତ ପାଟ୍ରୋଲିଂ, ଚଢ଼ାଉ ଓ ଆଇନ ଅନୁଯାୟୀ କଡ଼ା ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଆଜିର ଚଢ଼ାଉରେ ଏଏସ୍ପ୍ରଆଇ ଭାତ କୁମାର ବରଡ଼ା, କନଷ୍ଟେବଳ ମୁରୁଲିଧର ବିଶୋଇଙ୍କ ସମେତ ପୋଲିସ କର୍ମଚାରୀମାନେ ସାମିଲ ଥିଲେ।
ବ୍ରେକିଂ ଖବର