କଣ୍ଟାମାଳ/କ୍ରାନ୍ତିକ୍ଷେତ୍ର(ମନଧର କର୍ମୀ) : ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଖୁଣ୍ଟିଗୋରାଠାରେ ଡ୍ରାଇଭର ସଂଘ ପକ୍ଷରୁ ଭକ୍ତି ଓ ଶ୍ରଦ୍ଧାର ସହିତ ବିଶ୍ୱକର୍ମା ପୂଜା ଅନୁଷ୍ଠିତ ହୋଇଯାଇଛି। ଯାନବାହନ ଓ ଯନ୍ତ୍ରପାତିର ଅଧିଷ୍ଠାତା ଦେବତା ଭଗବାନ ବିଶ୍ୱକର୍ମାଙ୍କ ପୂଜାକୁ ନେଇ ଖୁଣ୍ଟିଗୋରା ଅଞ୍ଚଳରେ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା। ଏହି ପବିତ୍ର ଅବସରରେ କଣ୍ଟାମାଳ ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ମହୀଧର ରଣା ଯୋଗଦେଇ ଭଗବାନ ବିଶ୍ୱକର୍ମାଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ। ଏଥିସହ ଡ୍ରାଇଭର ସଂଘର ସଦସ୍ୟ ଓ ଉପସ୍ଥିତ ଅଞ୍ଚଳବାସୀଙ୍କ ସହ ସାକ୍ଷାତ କରି ପୂଜାର ଶୁଭେଚ୍ଛା ଜଣାଇଥିଲେ। ଡ୍ରାଇଭରମାନେ ନିଜ ଦୈନନ୍ଦିନ ଜୀବନରେ ଯାନବାହନ ସହ ଜଡ଼ିତ ରହି ବିଭିନ୍ନ ସ୍ଥାନକୁ ଯାତ୍ରୀ ଓ ସାମଗ୍ରୀ ପରିବହନ କରି ସମାଜର ଯାତାୟାତ ବ୍ୟବସ୍ଥାକୁ ସଚଳ ରଖିବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇ ଆସୁଥିବା ବେଳେ ବିଶ୍ୱକର୍ମା ପୂଜା ସେମାନଙ୍କ ପାଇଁ ବିଶେଷ ମହତ୍ତ୍ୱ ବହନ କରିଥାଏ। ପୂଜା ଅବସରରେ ଡ୍ରାଇଭର ସଂଘର ସଦସ୍ୟମାନେ ଏକତ୍ରିତ ହୋଇ ଭଗବାନ ବିଶ୍ୱକର୍ମାଙ୍କ ନିକଟରେ ଯାନବାହନର ସୁରକ୍ଷିତ ଚଳାଚଳ, ଦୁର୍ଘଟଣାମୁକ୍ତ ଯାତ୍ରା ଓ ସମସ୍ତଙ୍କ ମଙ୍ଗଳ କାମନା କରିଥିଲେ। ପୂଜା କାର୍ଯ୍ୟକ୍ରମରେ ସଂଘର କର୍ମକର୍ତ୍ତା, ଡ୍ରାଇଭର ସଦସ୍ୟ ଓ ସ୍ଥାନୀୟ ଲୋକମାନେ ଉପସ୍ଥିତ ରହି ଧାର୍ମିକ ପରିବେଶକୁ ଆହୁରି ଉତ୍ସବମୁଖର କରିଥିଲେ। ପୂଜା ମାଧ୍ୟମରେ ଭାଇଚାରା, ସାମାଜିକ ଏକତା ଓ ପରସ୍ପର ସହଯୋଗର ବାର୍ତ୍ତା ମଧ୍ୟ ଦେଖିବାକୁ ମିଳିଥିଲା। ଦିନଭରି ପୂଜାସ୍ଥଳୀରେ ଭକ୍ତଙ୍କ ଆଗମନ ଲାଗି ରହିଥିବା ବେଳେ ଡ୍ରାଇଭର ସଂଘ ପକ୍ଷରୁ ଆୟୋଜିତ ଏହି ବିଶ୍ୱକର୍ମା ପୂଜା ଶାନ୍ତି ଓ ଶୃଙ୍ଖଳାର ସହ ସମ୍ପନ୍ନ ହୋଇଥିଲା।
ବ୍ରେକିଂ ଖବର