ବୌଦ୍ଧ/କ୍ରାନ୍ତିକ୍ଷେତ୍ର(ମନଧର କର୍ମୀ) : ବୌଦ୍ଧ ଜିଲ୍ଲାରେ ଭାରତୀୟ ଜନତା ପାର୍ଟିର ସାଙ୍ଗଠନିକ କାର୍ଯ୍ୟକଳାପକୁ ଆହୁରି ସୁଦୃଢ଼ କରିବା, ତୃଣମୂଳସ୍ତରରେ ସଂଗଠନକୁ ସକ୍ରିୟ କରିବା ଏବଂ ଜନସାଧାରଣଙ୍କ ସହ ନିରନ୍ତର ଯୋଗାଯୋଗ ବଢ଼ାଇବା ନେଇ ଆଜି ବୌଦ୍ଧ ଜିଲ୍ଲା ବିଜେପି ପକ୍ଷରୁ ଜିଲ୍ଲା କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଛି। ବୈଠକରେ ଓଡ଼ିଶା ସରକାରଙ୍କ ବାଣିଜ୍ୟ ଓ ପରିବହନ ତଥା ଇସ୍ପାତ ଓ ଖଣି ମନ୍ତ୍ରୀ ବିଭୂତି ଭୂଷଣ ଜେନା ଯୋଗଦେଇ ଦଳୀୟ ସଂଗଠନ, ଜନସମ୍ପର୍କ ଓ ଆଗାମୀ ଦିନର କାର୍ଯ୍ୟପନ୍ଥା ସମ୍ପର୍କରେ ଆଲୋକପାତ କରିଥିଲେ। ସେହିପରି ସରକାରୀ ମୁଖ୍ୟ ସଚେତକ ତଥା ବୌଦ୍ଧ ବିଧାୟକ ସରୋଜ ପ୍ରଧାନ ଯୋଗଦେଇ ତୃଣମୂଳସ୍ତରରୁ ସଂଗଠନକୁ ଅଧିକ ସକ୍ରିୟ କରିବା ଓ କର୍ମୀମାନେ ଲୋକଙ୍କ ସହ ନିରନ୍ତର ଯୋଡ଼ି ରହିବାର ଆବଶ୍ୟକତା ଉପରେ ମତ ରଖିଥିଲେ। ବୌଦ୍ଧ ଯୋଜନା ବୋର୍ଡ ଅଧ୍ୟକ୍ଷ ତଥା କଣ୍ଟାମାଳ ବିଧାୟକ କହ୍ନାଇ ଚରଣ ଡାଙ୍ଗ ଗ୍ରାମାଞ୍ଚଳ ପର୍ଯ୍ୟନ୍ତ ସାଙ୍ଗଠନିକ କାର୍ଯ୍ୟକୁ ନେବା ସହ ସାଧାରଣ ଲୋକଙ୍କ ସମସ୍ୟା ଓ ଅଭିଯୋଗକୁ ଗୁରୁତ୍ୱ ଦେଇ କାର୍ଯ୍ୟ କରିବା ଉପରେ ଆଲୋକପାତ କରିଥିଲେ। ରାଜ୍ୟ ବିଜେପି ଉପସଭାପତି ଡଃ ଯତୀନ ମହାନ୍ତି ଦଳୀୟ ସାଙ୍ଗଠନିକ ଗତିଶୀଳତା, ଶୃଙ୍ଖଳା ଓ କର୍ମୀମାନଙ୍କ ଭୂମିକା ସମ୍ପର୍କରେ ମତ ରଖିଥିଲେ। ଜିଲ୍ଲା ସଭାପତି ପ୍ରେମାନନ୍ଦ ମିଶ୍ରଙ୍କ ଉପସ୍ଥିତିରେ ହୋଇଥିବା ବୈଠକରେ ଜିଲ୍ଲାର ବିଭିନ୍ନ ମଣ୍ଡଳର ସାଙ୍ଗଠନିକ ସ୍ଥିତି ଓ କାର୍ଯ୍ୟକଳାପ ନେଇ ମତବିନିମୟ ହୋଇଥିଲା। ଦଳୀୟ କାର୍ଯ୍ୟକ୍ରମକୁ ତୃଣମୂଳସ୍ତରରେ ନିୟମିତ ଭାବେ ଆୟୋଜନ କରିବା, ବୁଥ୍ସ୍ତରରେ କର୍ମୀମାନଙ୍କୁ ସକ୍ରିୟ ରଖିବା, ସରକାରୀ ଯୋଜନା ଓ ନୀତି ସମ୍ପର୍କରେ ଲୋକଙ୍କୁ ଅବଗତ କରାଇବା, କର୍ମୀମାନଙ୍କ ମଧ୍ୟରେ ସମନ୍ୱୟ ବଢ଼ାଇବା ଏବଂ ଦଳୀୟ ଦାୟିତ୍ୱକୁ ଶୃଙ୍ଖଳିତ ଭାବେ ପାଳନ କରିବା ଭଳି ବିଭିନ୍ନ ପ୍ରସଙ୍ଗ ଉପରେ ବୈଠକରେ ଆଲୋଚନା ହୋଇଥିଲା। ଏଥିସହିତ ସ୍ଥାନୀୟ ଅଞ୍ଚଳର ଜନସମସ୍ୟାକୁ ଚିହ୍ନଟ କରି ଲୋକଙ୍କ ଆବଶ୍ୟକତା ଓ ଅଭିଯୋଗକୁ ଗୁରୁତ୍ୱ ଦେବା ଉପରେ ମଧ୍ୟ ଆଲୋଚନା ହୋଇଥିଲା। ବିଭିନ୍ନ ମଣ୍ଡଳର ପଦାଧିକାରୀ ଓ କର୍ମକର୍ତ୍ତାମାନେ ନିଜ ଅଞ୍ଚଳର ସାଙ୍ଗଠନିକ କାର୍ଯ୍ୟଧାରା ସମ୍ପର୍କରେ ମତ ରଖିବା ସହ ଆଗାମୀ ଦିନରେ ସଂଗଠନକୁ କିପରି ଅଧିକ ଗତିଶୀଳ କରାଯାଇପାରିବ ସେନେଇ ମତବିନିମୟ କରିଥିଲେ। ବୈଠକରେ ଦଳୀୟ ନେତା, ପଦାଧିକାରୀ ଓ କର୍ମୀମାନଙ୍କ ମଧ୍ୟରେ ସମନ୍ୱୟ, ସକ୍ରିୟ ଭାଗୀଦାରି ଓ ଶୃଙ୍ଖଳିତ କାର୍ଯ୍ୟଧାରା ଉପରେ ଗୁରୁତ୍ୱ ଦିଆଯାଇଥିଲା। ଶେଷରେ ବୌଦ୍ଧ ଜିଲ୍ଲାରେ ଦଳୀୟ ସଂଗଠନକୁ ଆହୁରି ମଜବୁତ କରିବା, ଗାଁ ଓ ବୁଥ୍ସ୍ତରରେ ଜନସମ୍ପର୍କ ବଢ଼ାଇବା ଏବଂ ଦଳୀୟ କାର୍ଯ୍ୟକଳାପକୁ ଅଧିକ ସକ୍ରିୟ କରିବା ନେଇ ବୈଠକରେ ମତବିନିମୟ ହୋଇଥିଲା। ବୈଠକରେ ବହୁ ବରିଷ୍ଠ ନେତା, ବିଭିନ୍ନ ମଣ୍ଡଳର ପଦାଧିକାରୀ ଓ ଦଳୀୟ କର୍ମକର୍ତ୍ତା ଉପସ୍ଥିତ ଥିଲେ।
ବ୍ରେକିଂ ଖବର